RTR, Novas famiglias duain franar depopulaziun

Publicaziun: 05-12-2014, 07.10 / www.rtr.ch


Il forum «Interess Trun» vul dar cuntrapaisa a la depopulaziun. Sco quai che Martin Tomaschett da la gruppa d'interess di, vul ins far quai cun carmalar natiers novas famiglias. "Trun duai daventar il vitg il pli adattà per famiglias en la Surselva", declera Martin Tomaschett.

Era consequenzas per l'economia communala

Sche la depopulaziun cuntinueschia, lura haja quai en 10 onns mo pli 28 scolars en il stgalim aut dal consorzi da scola da Trun e Sumvitg. Cun uschè paucs scolars na possian ins betg mantegnair in stgalim aut da scola, uschia ch’ils scolars ston probabel ir a Mustér u a Glion a scola. Tenor Martin Tomaschett èsi lura era cler che las paucas famiglias bandunian la vischnanca u na vegnian segir betg a Trun ad abitar. Quai che donnegiassia era l’economia en il vitg.

Crear spazi da viver per famiglias

En in emprim pass vul il forum "Interess Trun" porscher spazi da viver adattà per famiglias. Sco Martin Tomaschett ha ditg, na chattian famiglias giuvnas betg abitaziuns adattadas a Trun. Perquai vul la gruppa d’interess realisar ina chasa da 4 abitaziuns. Uschia ha ella infurmà il cussegl da vischnanca actual e futur. Ils custs èn calculads cun 2 milliuns francs.

Vischnanca e fatschentas duain finanziar chasa da 4 abitaziuns

L’object vegn finanzià cun fundar ina societad per la construcziun da chasas. Realisabel saja il project dentant mo, sch’era la vischnanca dettia in emprest e sa participeschia sco societara vid la chasa. Quant aut che quest emprest stuess esser, dependa dal dumber d’ulteriurs societars privats ubain fatschentas da la vischnanca che sa participeschan.

Il schaner vegn la populaziun orientada. E sche lezza mussa interess, vegn fatg a la suprastanza ina dumonda concreta per in emprest da la vischnanca. (rtr/gh)

Emissiun: Actualitad da la saira: “Interess Trun” vul bajegiar ina chasa per famiglias (05-12-2014)


>> http://www.rtr.ch/home/novitads/archiv/2014/12/05/Trun-Novas-famiglias-duain-franar-depopulaziun.html